بیر مزار بویوندا یئر سوراغیندا
سهندی دومان آلیب،
یاشیل دونو سارالیب.
بوردا بیر غریب اؤلوب،
اؤلوسو یئرده قالیب.
من یارانان گوندن دردلی یاراندیم،
«وای ننه» چاغیرار بیزده دردلیلر.
آغلادیم، قیشقیردیم، باغیردیرم ـ ساندیم،
آنا وطنیم وار، قایغی چکر.
سن دئمه ازلدن یتیم‌میشم من،
آنا یورددان، آنا وطندن ساری.
بونو گیزله‌میشدی هامیلار مندن،
حاق قارقیسین اینسان آلدادانلاری.
ائله‌ده قایغیسیز، السیز، آیاقسیز،
توللاندیم حیاتین بورقانلارینا
بالتاسیز، ناجاقسیز، دایاناجاقسیز،
آتیلدیم طالعین عومّانلارینا.
ایلیشه ـ ایلیشه ایلیشیملره،
سیریمسه‌دیم، بویا ـ باشا یئتیشدیم.
یانغینلارا آتیلسام دا مین کره،
یانیب کول اولمادیم، قاینادیم ـ پیشدیم.
آز ـ ماز گؤز ـ قولاغیم آچیلان زامان،
گؤردوم هامیلارین آدی ـ سانی وار.
بیر منیم آدیما دئییرلر جیرتدان،
هر کسین ائل ـ گونو، دودمانی وار.
بو دردن، بو غمدن یاندیم، آلیشدیم،
حسرتیم داغلاری ـ داشی یاندیردی.
کول ـ اولوبان تورپاقلارا قاریشدیم،
آلووم قورونو، یاشی یاندیردی.
من ده مجنون کیمی دوشدوم چؤللره،
لئیلام ایسه یوردوم، وطنیم اولدو.
چوخ دولاندیم، باش اوزاتدیم، هر یئره،
آیاقلاریم قابار چالدی، یورولدو.
سحر ـ آخشام یوللار اوسته دایاندیم،
گلندن ـ گئدندن خبر سوروشدوم،
سوراق آلانمادیم، آنجاق، بوشاندیم،
گئت ـ گئده حسرته، غمه یاندیم.
بیر گون بیر قوجایا توش گلدیم، سوردوم،
گؤردوم گیزلی ـ گیزلی منه گؤز ووردو.
واردیم، خلوت یئره، یولوندا دوردوم،
الیمه کؤهنه بیر کیتاب قیسدیردی.
اوخودوم، دیرچلدیم، آیاغا قالخدیم،
شیمشک اولوب چاخدیم، وولکانا دؤندوم.
بولود تک کیشنه‌دیم، سئل اولوب آخدیم،
کؤکسو داغ‌دالغالی عومّانا دؤندوم.
وارلیغیمی دانان قلبه‌زنلرله،
یامان یاخالاشدیم، یامان ووروشدوم.
یالان ـ پالانلارین تاپشیردیم یئله،
حاقسیزلیغا قارشی یامان ووروشدوم.
اورک سؤزلریمی، حاق سؤزلریمی،
قایا کیمی دوشمان کؤکسونه ووردوم.
غصبکارا جومرد بابالار کیمی،
گاه قان قوسدوروبان، گاه قان اوتدوردوم
الیمدن زینهارا، زارا گلنلر،
کؤپک کوشگورتدولر، ایت بوراخدیلار.
حاق سؤزومه جاواب وئره‌نمیه‌نلر،
قددره قوللانیب، قمه تاخدیلار.
گوجوم گوجلرینه چاتانمادیقدا،
هر طرفدن منی دؤوره‌له‌دیلر.
سونگونو بؤیرومه سانجیب آدیما
وطنسیز دئدیلر، نه‌لر دئدیلر!...
یئنه داغلار کیمی دوردوم، دایاندیم،
نه چکیندیم، نه ده سؤزومو چاشدیم.
محکمه‌لرینی اگلنجه ساندیم،
دنیز کیمی جوشدوم، کوکره‌دیم، داشدیم.
آیاغی کونده‌لی، قوللاری باغلی،
سسیمی اوجالتدیم، آچدیم دیلیمی.
اورگی غوبارلی، سینه‌سی داغلی،
دئدیم، هر دردیمی، هر نیسگیلیمی.
ائی عیرق افسانه‌سینی اوزه چکنلر،
روحونوزو شئیطان چوشلاییب بوتون.
قارداش قیرغینی‌نا توخوم اکنلر،
اکدیگینیزه پئشمان اولارسیز بیر گون.
بیر پارا سؤزو چوخ اوزه چکمه‌یین،
بوش سانمایین بئله چوخدا مئیدانی،
قیپچینین، بو قدر سوخمایین گؤزه،
آنانیزدان قالان کیرلی تومانی.
کاش بو «تمیز نژاد»، «پاک قان»لاریزلا،
هیتلرین دیرناغی اولابیلئیدیز.
خام خیاللار، گولونج یالانلاریزلا،
قوبلزلردن عیبرت آلا بیلئیدیز!
گئدئیدیز برلینه یادا لوندونا،
اوستون نژادلارین گؤرئیدیز حالین.
بلکه سیغینایدیز اینسان قوینونا
سونون دوشونئیدیز بوش خیاللارین.
گؤرئیدیز مئیدانا چوخ گئج گلیبسیز،
معرکه ییغیشیب، اویون قورتولوب
بوش یئره چاپیبان آت چرله‌دیبسیز
گلین ارکک چیخیب، توی باطیل اولوب.
گؤرئیدیز خالقلار قالخیب آیاغا،
وارلیغین، منلیگین آختاریر سین ـ سین.
کیمسه نه نؤکردیر، نه ده کی، آقا،
نه ایستر ازیلسین، نه ده کی، ازسین.
تاریخ کدرلنمز گوزگویه بنزر،
اوندا گؤرمک اولار، اگرینی ـ دوزو.
بیر مصلحتیم وار، دینله‌سز اگر،
بو آینادا گؤرون اؤز اؤزونوزو.
ظن ائتمه‌یین یئنه قلم سیزده‌دیر،
سیزلره مخصوصدور کیتابخانالار.
آغی ـ قارا یازماق الینیزده‌دیر،
یوخ!... بو گون میلیونلار باشا دوشن وار.
دیرشه بیلسه‌ده کیم حقیقتله،
خالقی آلدادانمیر، اؤزو آلدانیر.
دیزه چوکدورولسه میلیون قالیله،
یئنه یئر دولانیر، یئنه فیرلانیر.
چوخ یاخشی بیلیرسیز فیریلداقچیلار،
من نه وطنسیزم، نه ده گؤبه‌لک.
دوغما دیاریم وار، بؤیوک ائلیم وار،
منیمدیر هم کئچمیش، هم ده گله‌جک.
منه نه عیرق، نه ده بابا یونتایین،
اؤزوم، اؤز کؤکومو یاخشی تانیرام.
گئدین اؤزونوزه «بابا» آرایین،
سیزین یئرینیزه من اوتانیرام.
قاطیرینیز چوخدا باش آپارماسین،
قودورمایین بئش گون یایان اولموشام.
منی چوخ دا بئله حقیر سانمایین،
ایگنه‌می یئینه قیییق قوسدورام.
خاما باغلامیشام قیر آتی هله،
بیر گون بوتون مینیب اویناداجاغام.
ائل ـ اولوسونوزا سالیب ولوله،
سیزه قان قوسدوروب، قان آلاجاغام.
بئش گونلوک بگلیگی بگلیک سانمایین،
ایشین دالیسینی دوشونون، دویون.
بوش یئره اؤیونوب خوروزلانمایین،
دالی گونونوزه بیر کؤرپو قویون.
بیر آن زنجیرلری آچین دیلیمدن،
بو دیل میلیونلارین آنا دیلیدیر.
قورخون غضبیمدن، قورخون کینیمدن،
ساغالمایان یارام دیل نیسکیلیدیر.
مین ایل قاباق بابام قازان دئمیشکن:
بوتون سیزین اولسون تورپاغیم، داشیم.
تالادیقلارینیزی آلمیرام سیزدن،
قویون آنام ایله بیر قوجاقلاشیم.
یانیلمایین اگر یالواردیم سیزه،
آنام آیاق آلتدا قالماماق اوچون.
آنا، موقّدسدیر ازلدن بیزه،
قییماریق آیاقلار آلتینا دوشسون.
نامردلر زینهارا گلدی الیمدن،
چارمیخا چکدیلر منی هر یاندان.
قنّارایا آسلادیلار دیلیمدن،
یاتاغیم قورو یئر، اوتاغیم زیندان.
ایچیمده بوغولان قیشقیریق سسیم،
دمیر مییله‌لری تیترتدی یالنیز.
تک باشیما آرتیق نه جوشوب، داشیم،
اولدوزسوز یارانیب زاواللی یالقیز.
نه قدر باغیردیم، هارای قوپاردیم،
بوشلوقلاردا ایتدی آنجاق هاراییم.
دمیر زنجیرلری چئینه‌دیم، دارتدیم،
دادیما چاتمادی هاوادارلاریم.
کیریدیم، آغاردی ساققالیم، ساچیم
قاپینی آچدیلار، دئدیلر، ایتیل!
بیلمه‌دیم هایانا اوز قویوب قاچیم،
اومودسوز، آرزی‌سیز، یئر ـ یوردسوز، سفیل.
یئنه‌ده اوز قویدوم داغلارا ساری،
بلکه دالداناجاق آرایا بیلم.
بلکه تاپا بیلم آنام دیاری،
قوینونا سیغینیب بیر آز دینجلم.
یورولدوم ـ خورد دوشدوم، گئتدیم اویقویا،
دربه‌در گزمکدن آخیر اوساندیم.
اپریمیش بیر قاری گلدی یوخوما،
دیسکیندیم، خوفلاندیم، ایسکلت ساندیم.
باشیما ال چکدی قورخوم تؤکولدو،
خوش باخیشلاریندان گؤردوم تانیشدی.
مهریبان ـ مهریبان اوزومه گولدو،
دؤندو دیله گلدی، منله دانیشدی:
قورخما، عزیز بالام! گزدیگین منم،
اپریمیش اولسام دا، گل، قوجاقلاشاق.
هامان آختاردیغین آنا وطنم،
آنا اؤلوسوندن چکینمز اوشاق.
بیلیرم دردیوی، هر نیسگیلیوی،
دولانیم باشووا، دؤنوم گؤزووه.
دانیش، قوی، دینله‌ییم دردلی دیلیوی
جانیم قوربان اولسون شیرین سؤزووه!
سؤیله‌دیم، یوخ آنا! سن دانیش‌گیلن،
سؤیله، نه اولوب بو گونه دوشوبسن؟
دانیش طالعیندن، دانیش گونوندن
دانیش یازیق آنا، زاواللی وطن.
قورو کلّه‌ده‌کی گؤز یئرلریندن،
باخدیم، داملا ـ داملا یاش دامجیلادی.
لاکین کلمه وئریب آلمادی اصلا،
ایچیم آلوو چکدی، اورگیم یاندی.
اتگین آختاردیم اله گلمه‌دی،
یالواردیم، آسلاندیم سوموکلریندن.
آنا اورگی ایدی، دؤزه بیلمه‌دی،
آخیر دیله گلدی، دانیشدی منلن.
دینله، دردلی بالام، دردیمی دینله،
درد اهلی آرتیق درد چکمگه نه وار؟
گل، بیر ـ بیر تانیش اول کدرلریمله،
دردین دولو گرک، دئمیش آتالار.
گوناهکار توتورسان گئت توت هر کسی،
آنجاق، او گوندن کی، اسیر توتولدوم،
بویوندوروق آلتدا قارا مال کیمی،
یئر شوملادیم، هولالارا قوشولدوم.
یارالی چیگنیمله چمنلر سؤکدوم
تارلالار بیتیردیم چاییرلیقلاردان.
گئجه‌لر آج قالدیم، گونوز تر تؤکدوم،
دیزیمین طاقتی توکنن زامان.
دؤندولر اتلیگه کسدیلر منی
قوشا چاتما قوروب تونقال یاپدیلار.
چاغیردیلار بوتون یولدان اؤته‌نی
دریمی سویدولار، شیشه تاخدیلار.
دؤوره‌لندیم، شولن بوریانی تکین،
هر کاباب ایگینه ییغیشیب گلن،
پیچاغین چیخاریب، چکدی قمه‌سین،
بیر پارچا سییریب کسدی اتیمدن.
یاراماز اوغوللار یاریماسینالار،
چوخ قافاسیز چیخدی سون بابالارین.
یورد وئریب قوللوغو ساتین آلدیلار،
الدن گئتدی بوتون وارلیغیم، واریم.
دؤنرگه دولاندی، اوجاغیم سؤندو،
دوغما یوردوم دوغراق دوغراق دوغراندی.
قارقالار قارتالا، لاچینا دؤندو،
قارتال قوزغون اولدو، قوش قارقالاندی.
اتیم یئییلسه‌ده، نئیلک، یئییلسین،
چالیش خاطیره‌می عزیزله، ساخلا.
قویما باری مزاریم اولا ایتگین،
ییغ سوموکلریمی، بیر یئر تاپ، قویلا.
بیزده آنا حقّی تانری حقّیدیر
مگر وصیتین اونوتماق اولار؟
آنا تاپشیریغین یئرینه یئتیر،
مرد ایگیت بورج اوسته جانینی قویار.
آنانین هر سؤزون، هر وصیتین،
حلال سود امنلر اونودا بیلمز.
یورومک نه قدر اولسا دا چتین،
مرد ایگیت یولوندان اوز دؤندرنمز.
او قورخونج رؤیادان آییلان گوندن،
نه گئجه‌م قالیبدیر، نه‌ده گوندوزوم.
یالنیز بیر سئودانین دالینجایام من،
قورو سوموک گزیر هر یئرده گؤزوم.
جان آتیب، آختاریب یورددان، یووادان
آنجاق بیر تورباجیق سوموک ییغمیشام.
گزیب دولانیرام، سفیل، سرگردان،
هارادا قویلایام، هاردا باسدیرام.
بو گئنیش دونیادا ارلر، یارانلار،
هر یئر باشدان ـ باشا قاپسانمیش بوتون.
ای وطن داشینی دؤشه وورانلار،
مزاردا تاپیلمیر وطنیم اوچون.
من کی بیر وطنسیز، یوردسوز شاعیرم،
بیر عؤموردور سیتقاییب اینله‌ییرم.
کیمسه‌دن نه قان، نه دییه‌ت ایسترم
بیر مزار بویوندا یئر دیله‌ییرم.
یوردومو ـ یووامی باسیب آلانلار،
فقط نئچه قاریش یئر وئرین منه.
بوتون سیزین اولسون بو اؤلکه ـ دیار
بیر مزار قاییریم آنام وطنه.
